Претседателот на ФИФА, Џани Инфантино испрати писмо до асоцијациите членки на Светската фудбалска асоцијација во кое го објави соопштението од американското Министерство за правда за доделените 201 милион долари на фондацијата на ФИФА, како надомест на штетата што ја претрпеа ФИФА, КОНКАКАФ и КОНМЕБОЛ поради корупциските скандали што му наштетија на фудбалот во изминатите децении.

Во писмото на Инфантино стои:

Драги пријатели,

За сите нас кои го сакаме фудбалот, 20. мај 2015 година засекогаш ќе остане врежан во нашите сеќавања. Како што може да се сетите, тој ден, Министерството за правда на САД поднесе обвинение за 14 фудбалски службеници под обвинение за рекет, измама преку интернет и перење пари, меѓу другото, а во врска со нивното учество во неколку шеми во текот на 24 години со цел збогатување преку корупција во меѓународниот фудбал.

Ова беше само почеток на понатамошните истраги и гонења против поранешни челници и високи фудбалски функционери, кои оттогаш траат во САД и Швајцарија. Од мојата инаугурација во февруари 2016. година, со сите вас започнав да работам за новата ФИФА - глобално, модерно, транспарентно и сигурно фудбалско раководно тело. Делата зборуваат погласно од зборовите, а во последните пет години постигнавме значителен напредок во таа насока, што беше признато и од јавните власти и од различни меѓународни институции.

Од 2016. година, исто така си поставив предизвик да соработувам што е можно повеќе со државните тела во тековните истраги во САД и Швајцарија. Фудбалот беше криминално нападнат од оние кои имаа должност да го заштитат. Не постоеше никаква правна или морална опција, освен тесна соработка со надлежните тела, целосно нудејќи ја нашата достапност за процесуирање на злосторствата извршени од поранешни фудбалски службеници. Денес ги гледаме придобивките од оваа соработка.

Во овој контекст, со задоволство ви го приложувам официјалното соопштение објавено вчера од страна на Министерството за правда во Њујорк, како и официјално соопштение од ФИФА за ова прашање. Министерството за правда додели износ од 201 милиони долари за Фондацијата ФИФА, како надомест за штетата што ја претрпеа ФИФА, КОНКАКАФ и КОНМЕБОЛ, како резултат на корупциски скандали што му наштетија на фудбалот во изминатите децении. Парите беа запленети од банкарските сметки на поранешни службеници кои беа вмешани во аферата, а потоа беа гонети за повеќегодишни коруптивни зделки. Овој износ ќе биде вратен во фудбалот, таму каде што припаѓа, преку Фондацијата на ФИФА и нејзиниот новоформиран Светски фонд за ремисија во фудбалот. Децата од целиот свет на тој начин ќе имаат голема корист. Ова е голема победа за ФИФА и фудбалот.

Оваа одлука Министерството за правда го потврдува значајниот напредок што го постигнавме во контекст на добро управување и транспарентност од 2016 година, за што службениците на ФИФА разговараа на состаноците со обвинителите во Њујорк во 2018. и 2019 година, односно за време на мојот состанок со јавниот обвинител на САД во 2020 година.

Им благодарам на американските власти за довербата во ФИФА. Ќе се погрижиме парите да бидат соодветно потрошени и ќе бидат од корист за оние на кои навистина им се потребни. На крајот, ви благодарам лично и на сите вас, бевте витален дел од трансформацијата на ФИФА и вашата поддршка и тесна соработка се клучен елемент на заедничкиот пат што не застанува тука. Мораме да продолжиме да работиме заедно за да ги консолидираме фудбалските институции на национално и меѓународно ниво, претворајќи ги во организации кои работат во согласност со принципите на добро управување и вистинска корпоративна одговорност.

Со оваа одлука на Министерството за правда, минатото конечно е зад нас. ФИФА денеска гледа само кон иднината.