Во пресрет на почетокот на пролетната полусезона од МФЛ, Судиската организација во рамки на ФФМ во Велес организираше семинар за млади и надежни судии, но и тестирање на физичките активности за судиите од главната и помошната листа. Во текот на петте денови од семинарот 38 судии полагаа испит за стекнување Републичка и Прва судиска категорија.

Во рамки на семинарот свои активности имаа главните и асистентите судии од нашата Прва и Втора лига, кои имаа теоретски тестови, а потоа и физички тестирања, а учество земаа и инструкторите кои се на контролорската листа од Првата и Втората лига.

-Пред почеток на полусезоната редовна пракса е да организираме ваков тип на семинари каде што добиваме увид во подготвеноста на судиите. Судиите полагаат физички норми, а теоретски имаме предавања за правилата на фудбалска игра , промените и многу значајно работиме на изедначување на критеериуми со видео анализа на натпреварите од македонскиот шампионат и видео анализи од Уефа, истакна Емил Божиновски, претседател на судиската комисија во ФФМ.

На судиите од меѓународната листа новите амблеми на ФИФА им ги предаде претседателот на ФФМ, Илчо Ѓорѓиоски.

-Во модерниот фудбал придонесот на струката и едукацијата на сите кои, помалку или повеќе се вклучени во општиот успех на фудбалската игра станува се поголем. Исто така, веќе е добро познато дека и сегментите на анализа на кондициските способности и теоретското знаење стануваат се поважни. Тоа е една од главните причини зошто ФФМ длабоко ги поддржува ваквите семинари, а посебно бидејќи се вклучени и многу млади судии. Иако секој сегмет од вложувањата и унапредувањата има своја цена, таа не мора секогаш да биде финансиска, туку може да биде и вложување во знаење. Овој тип на семинари е токму тоа, судиите и контролорите да добијат ново или го потврдат своето знаење. Нас ни е мило што имаме добар одзив и квалитетна програма, истакна претседателот на ФФМ, Илчо Ѓорѓиоски.