Нашата млада селекција веќе е во Рејкјавик каде денеска во 21.15 по македонско време ќе го одработи официјалниот тренинг спроти првиот квалификациски натпревар. На тимот предводен од Благоја Милевски му се приклучи и фудбалерот на Барселона Б, Давид Бабунски. Дефанзивецот на француски Рен, Ѓоко Зајков смета дека екипата ќе биде на висина на задачата на утрешната пресметка. 

-Важно е сите да бидеме на високо ниво, да со помагаме еден на друг, да бидеме пожртвувани, а ако го имаме тој пристап мислам дека нема да има проблеми за нашиот голман. Веруваме во своите квалитети, одлично се подготвивме за дуелот и се надеваме дека со позитивен резултат ќе ги отвориме квалификациите, вели Зајков.

Нашиот репрезентативец и фудбалер на Силекс, Ангелче Тимевски вели дека Исланд е квалитетна екипа, но најважни сме ние и доколку ги исполниме инструкциите на селекторот Милевски ќе оствариме добар резултат.

-Имавме релативно долги подготовки и одлично ги реализиравме. Ќе се обидеме да го наметнеме својот ритам на игра, ќе се бориме да освојуваме топки и да создаваме шанси. Исланд потврди дека е многу квалитетен тим, но доколку ние одиграме на начинот на кој тоа го бара селекторот сметам дека ќе успееме позитивно да ги отвориме квалификациите, вели Тимевски.

Дарко Велковски веројатно ќе има многу важна улога во играта на македонската репрезентација, фудбалерот на Работнички е подготвен за предизвикот, верува во успех.