Македонската репрезентација до 16 години ја оствари втората победа на развојниот турнир на УЕФА кој го организираме во Скопје. Нашата кадетска репрезентација по подобро изведување пенали славеше против Луксембург. По регуларните 80. минути двете селекции одиграа 2:2. Македонија не промаши во пенал серијата и го доби натпреварот со 5:3.

Филип Алексовски со погодок во 29. минута го отвори резултатот и фудбалерите предводени од Добринко Илиевски заслужено имаа предност на полувреме во кое пропуштивме уште неколку добри прилики за гол. 

Во второто полувреме, најдобриот гостински фудбалер Јаник Шо постигна два гола за пет минути, во 41. и 46. минута за водство на Луксембург од 2:1. Сепак, Васил Крстев во 68. минута успеа да постигне гол за израмнување и да го однесе натпреварот во пенал рулет во кој бевме максимално прецизни и славевме со 5:3.