Репрезентацијата на Македонија утре против Грузија на Националната арена „Тодор Проески“ го игра натпреварот во рамки на четвртото коло од Лигата на нации. Селекторот Игор Ангеловски и капитенот Горан Пандев зборуваа на прес-конференцијата истакнувајќи дека противникот е силен, но наша должност е да го дадеме максимумот, а целта е победа на мечот.

„Атмосферата во екипата е добра, иако не го остваривме планираното во Естонија. Сепак, да не заборавиме дека нашата главна цел ја постигнавме, а тоа е дека Македонија е на чекор до Европско првенство. Утре имаме натпревар со противник со кој ќе се сретнеме во финалето и без разлика на сите отсуства, сите кои ќе истрчаат на теренот, должни се да го дадат максимумот. Прв пат играме во седум дена три натпревари, првиот натпревар беше многу важен од секаков аспект. Селекторот на Грузија исто има проблеми со повреди и отсуства, но на нас селекторите е да го искористиме тоа што го имаме. Не очекувам противникот да калкулира со составот, напротив“, изјави Ангеловски.

„Секако дека ќе им дадам поддршка на сите играчи кои ќе настапати ја имаат мојата поддршка. Имаме многу нови играчи, секако им треба мотив и јас стојам зад нив. Ќе го дадеме максимумот. Сите што сме тука конкурираме за првите единаесет. Ритамот е пеколен, три меча и тешко е. Не може секој меч да се добие, но уверен сум дека утре ќе дадеме се од себе да оствариме нова победа без разлика кој ќе истрча на теренот“, рече Пандев.

Дуелот ќе се одигра на арената „Тодор Проески“, утре со почеток од 20:45 часот.