Баже Илијоски, еден од најискусните фудбалери во составот на македонската репрезентација смета дека можеме да им се реваншираме на кинезите за поразот од 2:0 на првиот натпревар во Шенјанг.

-Сметам дека одигравме квалитетен прв натпревар против Кина, примивме два несреќни гола по наша грешка.Очекувам уште поквалитетна игра на втората пресметка, имам чувство дека ќе бидеме концентрирани и во реализицијата, дека ќе постигнеме гол повеќе од противникот и ќе им се реваншираме за поразот на првиот дуел, изјави Баже Илијоски.

Дарко Велковски на натпреварот во Шенјанг играше на позицијата централен дефанзивен играч и беше еден од фудбалерите кои оставија многу позитивен впечаток.Дебитантот во македонската репрезентација е оптимист пред вториот контролен дуел меѓу двете селекции.

-Прикажавме добра игра на првиот дуел, има причини за оптимизам, задоволен сум и од мојот придонес на позицијата која ми ја одреди селекторот. Имавме поголем посед на топка и две одлични шанси во првото полувреме кои за жал не ги искористивме. Во вториот дел кинезите казнија за нашите грешки, игравме и поофанзивно, повторно создадовме неколку добри шанси, но не бевме ефикасни. Се надевам дека на вториот натпревар ќе бидеме многу подобри и дека и конечниот резултат ќе биде во наша корист, изјави Дарко Велковски.

Натпреварот Кина – Македонија се игра на Шандонг стадионот во Јинан.