Фудбалската федерација на Македонија (ФФМ) се соочува со неоснован притисок од страна на лица и медиуми коишто не се точно информирани за работата на ФФМ и свесно или не, наштетуваат на кредибилитетот на федерацијата. Имено, соочени сме со клевети од различни страни за да се наруши угледот на институцијата.

Наместо наводите дека молчиме, фактите говорат поинаку. Нашата институција е транспарентна во однос на работењето, а само поради тоа бевме соочени со внатрешен скандал којшто ние самите го пријавивме до надлежните институции за да се преземат мерки за негово расчистување и решавање.

Ставот на Федерацијата е дека единствено институциите, односно во овој случај, Јавното обвинителство и истражните органи треба да ја водат истрагата пријавена од наша страна за која што се доставени сите потребни документи под сомнение дека е извршена злоупотреба на службена должност.

„Како Фудбалска федерација на Македонија, секако не се чувствуваме спокојно откако го проследивме последниот текст во одредени медиуми и ги слушнавме изјавите на одредени лица, каде што директно се напаѓа нашето работење. Како транспарентна институција збунувачки е фактот кога одредени лица не клеветат за нешто за кое што ние самите сме пријавиле до надлежните институции. По пријава од страна на ФФМ и сомнение за проневера, Јавното обвинителство отвори предистражна постапка која сеуште е во тек и било каква информација до медиуми од наша страна би била неодговорна и негативно може да влијае врз постапката. Во овој случај, единствено институциите се надлежни, а по расчистување на целиот процес, ФФМ ќе ги изнесе сите факти и документи кои беа доставени до надлежните. Во овој момент, не би сакале да шпекулираме со бројки и непотврдени информации, а ги поттикнуваме сите оние кои сметаат дека можат да помогнат на истрагата, да ги изнесат своите информации до Јавното Обвинителство, со што би му помогнале на процесот. Благодарност за загриженоста, но ја уверувам јавноста, посебно фудбалската дека нашето работење не е загрозено. Во моментот сме и ќе продолжиме да бидеме поттик и поддршка за сите национални репрезентации, клубови и воопшто, за целото фудбалското семејство. Се надевам и многу повеќе по расчистување на случајот “ - изјави Муамед Сејдини, претседател на Фудбалската федерација на Македонија.

За овој случај се огласи и Агенцијата за млади и спорт. Најпосле, во целост се согласуваме со нивниот став во кој велат дека секој кој што го прекршил законот и кој што направил било каква проневера на финансиски средства што доаѓаат дали од државата, дали од меѓународните организации, односно федерации, како што е во конкретниот случај, треба да сноси одговорност. 

Кршење на закон од било когo и на било каков начин, не само финансиски, секако мора да сноси одговорност и последици.