Македонската репрезентација до 17 години оствари шест победи на последните седум контролни натпревари и селекцијата предводена од Горан Станковски со право се надева дека позитивната резултатска низа ќе продолжи. Нашата млада селекција за важниот квалификациски турнир за пласман во Елитната фаза формата ќе ја „бруси“ и со натпреварите кои ќе следуваат кон крајот на август против Унгарија во Скопје, а потоа ќе гостуваме и на турнир во Летонија. Сите овие активности се подготовка за квалификацискиот турнир во Полска кога ќе се соочиме со домаќинот Полска, Белгија и Лихтенштајн.

Од крајот на март до средината на јуни, македонската репрезентација до 17 години забележа три победи на развојниот УЕФА турнир во Скопје, против Азербејџан (2:1), Грузија (2:0) и Саудиска Арабија (2:0), потоа на турнирот „Миљан Миљаниќ“ во Стара Пазова  ја совладавме Бугарија (1:0), а единствениот пораз го доживеавме против Србија (0:1) во натпревар на кој судиите беа во главна улога и директно влијаеја на резултатот. На последните два контролни натпревари запишавме две победи против Албанија (1:0) во Охрид и 2:0 во Корча.

 -Со оглед на тоа дека остваривме шест победи, а одговорно тврдам дека ни беше одземена победа и против Србија, задоволен сум од подготвителниот период и учинокот на тимот. Ме радува тоа што фудбалерите го прикажаа, а посебно од нивната дисциплина и одговорност во играта. Секако, имаме доволно време и да корегираме некои работи, но генерално одиме во посакуваниот правец. За нас е важен и периодот кои следува, посебно тренинг кампот во август и ќе се обидеме да го задржиме нивото кое ни носи и добра атмосфера и посакувани резултати, вели селекторот на репрезантацијата, Горан Станковски.

Македонската селекција до 17 години по завршувањето на тренинг кампот ќе одигра два контролни натпревари во Скопје против Унгарија, а потоа ќе патува за Летонија каде ќе учествува на турнир.