Младата репрезентација на Македонија до 21 година во воведното коло од квалификациите за пласман на ЕП 2025 играат против селекцијата на Шведска на гостински терен. Натпреварот на програмата е на 8. септември, во Јенчепинг, со почеток од 18. часот. 

Четири дена подоцна, на тренинг центарот „Петар Милошевски", во Скопје, во 15:30 часот го пречекуваме фаворитот во групата, селекцијата на Холандија.

Селекторот на репрезентацијата на Македонија до 21 година, Драги Канатларовски, даде свој коментар околу составот со повикани фудбалери и ги сподели своите очекувања за претстојните квалификациски натпревари.

-Започнуваат квалификациите за пласман на ЕП 2025. Претходниот период се подготвувавме навистина многу добро и со големо внимание и нетпрение го очекуваме стартот на овие квалификации. На списокот се повикани фудбалери кои во изминатава година покажаа најголем квалитет и континуитет на добри игри. Фудбалери кои се стандардни како во репрезентацијата, така и во своите клубови и сосесама заслужено се најдоа на овој список. Се надевам дека ќе продолжиме во ист  ритам на добри игри и ќе успееме да оствариме позитивен успех на овие квалификациите. Фудбалерите мора да веруваат во себе, треба да бидат подготвени на борба и да дадат се од себе за дресот со државен грб. 

-Најпрво треба да се фокусираме на првиот натпревар, на гости против силниот тим на Шведска. Имавме доволно време да го анализираме составот на Шведска, нивниот начин на игра. Добро е кога ќе можеш да ја препознаеш играта на противникот, но најдобро е кога се познаваш себе и своите квалитети. Ја искористивме изминатава година да одиграме што повеќе натпревари и да се подгтовиме што е можно подобро за предизвиците што не очекуваат во овие квалификации. Одигравме дванаесет контролни меча, во кои одлично се запознавме со карактеристиките на играчите и ја одредивме формацијата и тактитката за претстојните натпревари.

-Одлично функционираме како тим, се надевам дека ќе го продолжиме трендот на позитивни игри и резултатити и во воведните кола на овој квалификациски циклус. Сакаме на мечевите со Шведска и Холандија да освоиме што е можно повеќе бодови, а секако најсреќни би биле доколу ги освоиме и сите шест бода.

-Располагаме со квалитетна група на млади, но веќе докажани фудбалери како во репрезентацијата, така и во клубовите. Би сакале да го повториме успехот од 2017 година и пласманот на Европското првенство во Полска. Овие играчи не се веќе само таленти, туку се и изградени фудалери. Тоа е мојот став, ако сакаме успех, мора да веруваме максимално во себе, да бидеме подготвени на борба и да фукнционираме како колектив тоа мојот став. 

Собирот на репрезентацијата на Македонија до 21 година е на 3. септември, во 12. часот во хотел Парк, во Скопје.