Градоначалникот Никола Бакрачески вели дека оваа донација од ФФМ ќе даде нов импулс во развојот на спортот во Охрид. „Се надевам дека овој терен на вештачка трева кој што е изграден по највисоките стандарди на УЕФА ќе биде одлична можност за сите оние фудбалски друштва и клубови во Охрид, да почнат со адекватни подготовки, она без кое не може да се замисли развојот на фудбалот преку цела година, а не само за време на пролетта и летната сезона кога има идеални услови за тренинг. Правиме сѐ да ги мотивираме младите луѓе во Охрид сѐ повеќе да спортуваат и се надевам дека во блиска иднина во Охрид ќе никне фудбалски клуб, она што охриѓани го бараат од нас, она за што охриѓани се желни, а кое ние како одговорна локална власт сме обврзани да им го понудиме на граѓаните на Охрид “ изјави градоначалникот Никола Бакрачески.

Според Бакрачески, новото фудбалско игралиште воедно нуди и нова можност за развој на спортскиот туризам во Охрид, односно можност за сите спортски екипи своите зимски подготовки да ги реализираат во Охрид. Дополнително, според градоначалникот Бакрачески, ова игралиште е можност и за развивање на спортскиот дух кај најмладите.

Инаку димензиите на игралиштето со вештачка трева се 110 на 80 метри, со што ги задоволува стандардите на ФИФА И УЕФА.