Одделението за лиценцирање во Фудбалската федерација на Македонија (ФФМ) во рамки на програмата за поддршка и обука на клубовите во процесот на лиценцирање за добивање лиценца за УЕФА натпреварувањата, како и натпреварувањата од националниот шампионат (Прва МФЛ, Втора МФЛ и Прва ЖМФЛ) одржа шестдневна работилница (25.11.2024 - 02.12.2024.) во „Куќа на фудбалот“.

На оваа работилница учество земаа лицата кои се овластени од своите клубови за процесот на лиценцирање, како и генералните секретари на клубовите кои во сезона 2025/26 ќе се натпреваруваат во натпреварувањата на УЕФА и натпреварите од Националниот шампионат. 

Во рамките на работилницата, учесниците ги дискутираа следните теми и активности:

1. Увод во клупското лиценцирање:
• Основни принципи и цели на клупското лиценцирање.
• Значење на лиценците за клубови, со акцент на финансиите, управувањето и развојот.
2. Клучни критериуми за лиценцирање:
• Спортски критериуми: успеси на клубот, развој на млади категории, учество во лигите.
• Инфраструктурни критериуми: Стадиони, безбедност.
• Административно-Персонални критериуми: организација, транспарентност, тренери, доктори,физиотерапевти, комесари за безбедност.
• Општествена одговорност Критериуми: Стратегија и политика за заштита и благосостојба на младите.
• Правни критериуми: процеси на управување,правна структура.
• Финансиски критериуми: анализирање на буџетот, финансиска одржливост и транспарентност.
3. Процесот на аплицирање и проверка:
• Поставување на планови и подготвување на документи за апликација.
• Процес на проверка на исполување на условите од страна на експертите вклучени во процесот.
• Рокови и важни аспекти при поднесување на документи.
4. Етика и регулативи во спортското управување:
• Како да се избегнат злоупотреби и како да се одржи фер конкуренција.
5. Практична обука и студии на случаи:
• Работа во групи за користење на новата ИТ алатка за лиценцирање-МуКомет.
• Презентација на претходно успешни примери од клубови кои успешно поминале низ процесот на лиценцирање.
6. Комуникација со одделението за лиценцирање:
• Ефикасната комуникација во процесот на клупско лиценцирање е од суштинско значење за успешното исполнување на критериумите и за добивање на лиценцата. Клубовите треба да имаат организиран пристап за комуникација со сите заинтересирани страни, да обезбедат транспарентност во сите фази на процесот и да одржуваат професионални односи со одделението за лиценцирање и вработените.

Целта на овие работилници / обуки е да им овозможи на учесниците потребните вештини и знаења за да може нивниот клуб да помине успешно низ процесот на клупско лиценцирање, да го оптимизираат своето работење и да ја поддржат одржливоста на клубот. По завршувањето на обуката, тие ќе бидат подготвени да ги исполнат сите критериуми и да се соочат со предизвиците на патот до успешен процес на лиценцирање.

Александра Ѓурчиновска - оддел за клупско лиценцирање

„Процесот на лиценцирање на клубови кои учествуваат посебно во натпреварувањата на УЕФА е клучен за обезбедување на високи стандарди во европскиот фудбал. Овој процес не само што гарантира дека клубовите ги исполнуваат стандардите за учество во меѓународните натпреварувања, туку истовремено обезбедува и одржување на интегритетот и квалитетот на натпреварите, што е од суштинско значење за развојот на фудбалот на сите нивоа.

Како Фудбалска федерација на Македонија, нашата улога во овој процес е од големо значење. Нашата поддршка и помош за клубовите да се подготват за лиценцирање не само што ги олеснува овие напори, туку и значително придонесува за нивната успешност во меѓународните натпреварувања.

Нашата улога е да ги поддржиме клубовите преку различни обуки, консултации и техничка помош за да ги исполнат строгите критериуми за УЕФА и национално лиценцирање. Ова не само што им помага на клубовите да се квалификуваат за учество во европските натпреварувања, туку исто така обезбедува и долгорочен развој и стабилност на македонскиот фудбал. Секој напор вложен во поддршка на клубовите е инвестиција во иднината на спортот, што ќе придонесе за подобар квалитет на натпреварите и за развој на фудбалската култура во Македонија“.