Младата репрезентација на Македонија до 17 години го забележа првиот триумф на квалификацискиот турнир во Исланд за пласман во следната елитна рунда квалификации.

Избраниците на селекторот Раде Каранфиловски во третото коло забележаа победа над соодветната селекција на Естонија со 4:2. Македонија овој квалификациски турнир го заврши на третото место со 3 освоени бодови.

Играч на натпреварот беше младиот Стефан Бранковски, кој на оваа средба одигра извонредно и постигна три погодоци.

Првиот погодок за Македонија беше дело на Грашески во 19. минута. Бранковски во 28. минута погодува за 2:0. До крајот на првиот дел, нашите млади фудбалери со вториот гол на Бранковски стигнуваат и до убедлива предност од 3:0.

Во продолжението од средбата, Алама во 56. минута погодува за намалување на предноста. Бранковски во 76. минута го постигнува и својот трет погодок на денешната средба за враќање на убедливата предност. Во 90. минута, селекцијата на Естонија постигна почесен погодок за конечни 4:2.

Во вториот натпревар од нашата група, Исланд и Шпанија одиграа нерешено 2:2. 

МАКЕДОНИЈА: Трајков, Дамјановски, Стоилов, Кесиќ, Џангаровски, Јефтовски, Бајрами, Ангелевски, Грашески, Бранковски, Марковски;

Селектор: Раде Каранфилоски;

Во првото коло, Македонската селекција беше поразена од Исланд со 4:1. Во второто коло бевме убедливо поразени од Шпанија со 5:0.