Фудбалската Федерација на Македонија има за цел да изгради безбедна, пријатна и инклузивна средина за сите деца и млади кои играат фудбал.

Едукативниот центар при ФФМ го препознава клучното значење што го имаат тренерите во заштитата на децата.  Стручното усовршување на тренерите го смета како важен  дел во создавањето на безбедна и пријатна средина во којашто децата ќе тренираат и ќе го засакаат фудбалот со цел  да се развиваат, да  уживаат и да изградуваат здрави животни навики. Улогата на тренерот во млади категории е клучна во градењето на здрав однос спрема спортот во тек на понатамошниот живот. Едукацијата за заштита на деца и млади на тренерите е со цел да се  за подигне  свесноста за важноста на заштитата  и да се унапредат  практиките за заштита.

Во рамките на семинарот за тренери кој се одржува  во Дојран, на 1 јуни беше одржана работилница во која беа опфатени следните теми: што е насилство и типови на насилство,препознавање на знаци на злоупотреба, специфични ризици за децата вклучени во фудбалски активности и како да се реагира соодветно на сомнежи или грижи поврзани со заштитата на децата. Работилницата помина во конструктивна и интерактивна атмосфера во која што тренерите кои се едуцираат за Ц УЕФА лиценца ги споделуваа своите искуства и усвојуваа нови знаења.

Фудбалот е повеќе од игра! Со својата неверојатна моќ привлекува голем број на млади кои почнуваат да тренираат. Одговорност на сите возрасни вклучени во играта во било која улога е да направат фудбалот да биде безбедно место за игра и за уживање.