Pas tij është një karrierë e pasur ndërkombëtare dhe reprezentuese, ish anëtar i përfaqësueses së Maqedonisë, legjendë e Vardarit të Shkupit dhe një prej golashënuesve më të mirë të Nirnbergut të Gjermanisë, i cili ka zhvilluar shumë beteja futbollistike, duke dalë nga shumë prej tyre si fitues, tani gjendet para një sfide të një natyre tjetër. U kthye në funksion të futbollit të Maqedonisë, ndërsa pozitën e menaxherit teknik e kupton si lidhje ndërmjet Federatës, futbollistëve dhe stafit teknik të ekipit përfaqësues të shpresave. Potenciali i përfaqësueses është një arsye shtesë për kthimin e tij në futbollin e Maqedonisë.
“Përfaqësuesja e shpresave të Maqedonisë ka potencial të madh, sigurisht ajo është arsyeja kryesore që pranova të jem menaxher teknik, edhe pse tani më një kohë të caktuar kisha bashkëpunim të mirë me drejtuesit e federatës. Së bashku me sekretarin e ekipit, Zoran Zafirovin kemi përgjegjësi të sigurojmë gjithë kushtet e nevojshme për punë të papenguar të seleksionuesit të përfaqësueses Bllagoja Milevskit, vazhdimisht të jemi në kontakt me reprezentuesit, të ndjekim paraqitjet e tyre dhe të organizojmë mënyrën e përgatitjes së futbollistëve, si dhe të jemi pjesë e organizmit të ndeshjeve zyrtare dhe kontrolluese. Mundohemi të jemi lidhja ndërmjet lojtarëve, federatës dhe stafit tekni. Të punosh me futbollistë të rinj dhe njerëz pozitiv, është diçka shumë e madhe. Është një përvojë e madhe për mua, tani mund të kuptoj se çka ata lojtarë të rinj dijnë, çka u mungon. Kjo punë mua më kënaq dhe shpresoj të jetë afatgjatë. Gjithashtu, kënaqësi të madhe më sjell organizimi dhe pjesëmarja në ndeshjet me karakter humanitar të veteranëve të Maqedonisë. Organizojmë para se gjithash ndeshje me karakter humanitar dhe luajmë në gjithë vendin, posaçërisht në vende më të vogla”, shprehet Qiriq.
Ish-futbollisti i madh dhe golashënues i ekipeve të Bundesligës Nirnbergut dhe Ajntraht Frankfurtit thotë se atmosfera në ekipin e shpresave është në nivel të lartë, ndërsa kontribut për këtë kanë gjithë ata që janë të kyçur në ekip, më së shumti futbollistët që kanë qasje të shkëlqyeshme dhe respekt ndaj seleksionuesit.
“Kemi arritur të krijojmë atmosferë pozitive në përfaqësuese, ndërsa në këtë drejtim ndikim të madh kishin dy fitoret e fundit në ndeshjet kontrolluese me Malin e Zi dhe Rumaninë. Më së shumti më gëzon loja që tregon ekipi në këto ndeshje, ku konfirmojmë se pas çdo ndeshje tejkalojmë të ashtuquajturin ‘kompleks i të qenurit me vlerë më të ulët’. Dhe jo vetëm unë, më me rëndësi edhe futbollistët potencojnë energjinë e mirë në ekip dhe kjo nënkupton se jemi në rrugë të vërtetë”, tha Qiriq.
Për pritjet e opinionit futbollistik, Qiriq thotë se gjithmonë janë të mëdha dhe shihen me optimizëm. Rezultati në përfaqësuese varet edhe nga kundërshtarët që do të na jep shorti për kualifikimet për Kampionatin Evropian.
“Nëse marim parasysh rezultatet e kualifikimeve të fundit, ne nuk jemi favorit, mirëpo të presim shortin dhe në bazë të kundërshtarëve do të japim parashikime. E dij se respektojmë çdo kundërshtar, mirëpo nuk frikësohemi. Në çdo ndeshje patjetër të hyjmë me seriozitet maksimal, pasi në të kundërtën do të jetë shumë keq. Jam i bindur se futbollistët do të jenë të përgatitur fizikisht dhe psiqikisht dhe me energji pozitive do të hyjmë në ciklin e ri kualifikues në të cilin pres gëzime dhe fitore. Ne në çdo rast do të jemi përfaqësuese për respekt, as favoriti kryesor i grupit nuk do të kalojë lehtë dhe të llogarisë në pikë të sigurta kundër përfaqësueses tonë. Një pjesë e lojtarëve si Radevski, Velkovski, Babunski tani më kanë paraqitje edhe për përfaqësuesen A të Maqedonisë. Kjo është dëshmi për kualitetin e përfaqësueses së shpresave. Shpresoj që në një të ardhme të afërt ta vërtetojmë këtë edhe në ndeshjet e rëndësishme kualifikuese”, përfundoi Sasha Qiriq.