Maqedonia U21 barazoi me Armeninë në një ndeshje thuajse të fituar

Publikuar më 11 Септември, 2018 në Lajme, Deri më 21 vjet

Përfaqësuesja U21 e Maqedonisë sot barazoi 3:3 përballë Armenisë në takimin e vlefshëm për kualifikimet e Kampionatit Europian për të rinjë i cili vitin e ardhshëm do të zhvillohet në Itali. Shrpesat e vendit kishin epërsi 3:1 pas përfundimit të kohës së rregullt, mirëpo lejuan të pranojnë dy gola në kohën shtesë. Armenët mohuan fitoren në sekondat e fundit, mirëpo gjithsesi edhe me barazim Maqedonia U21 ndërpret serinë prej gjashtë humbjeve të njëpasnjëshme në kuadër të këtij cikli kualifikues.

Maqedonia U21 zhvilloi një pjesë të parë shumë pozitive, ndërsa epërsinë e merituar e solli Jani Atanasov me gol të bukur nga gjuajtja e lirë në minutën e 26-të. Në pjesën e dytë Maqedonia humbi disa mundësi të mira për dyfishim të rezultatit, ndërsa ndëshkimi erdhi në minutën e 56-të kur Avetisjan barazoi nga penaltia. Maqedonia riktheu epërsinë në minutën e 73-të kur Zdravkoski nga penaltia shënoi për 2:1, ndërsa u duk se fitorja u sigurua në minutën e 89-të kur Darko Çurlinov shënoi për 3:1 pas një solo aksioni vetëm 30-të sekonda pasi u inkuadrua në lojë.

Maqedonia U21 pa veten pranë fitores së dytë në këto kualifikime përballë të njejtit rival, mirëpo Armenia menaxhoi të shënojë dy gola. Fillimisht Amanoviq realizoi në rrjetë të gabuar duke dashur të pastrojë një situatë para portës, ndërsa në sekondat e fundit të ndeshjes Avetisjan shënoi për rezultat final 3:3 me goditja prej para zonës.

Maqedonia tani me katër pikë mban pozitën e pestë në renditje, para Gjibraltarit të fundit me tre pikë. Para Maqedonisë është Armenia me shtatë pikë, Austria mban vendin e tretë me 15-të, Rusia është e dyta me 16-të pikë, ndërsa bindshëm në vendin e parë me 21 pikë është Serbia.

MAQEDONIA U21 – ARMENIA U21 3:3 (1:0)
Golashënues: Atanasov 26’, Zdravkovski pen. 73’, Çurlinov 89’ (Maqedonia U21), ndërsa Avetisjan 56’ pen. dhe 90’+3, si dhe Amanoviq 90’ autogol (Armenia)
MAQEDONIA U21:Stevkovski, Manevski, Amanoviq, Trajanovski, Todorovski, Zdravkovski, Jevtovski, Atanasov (Fazllagiq 71’), Gjorgjev, Ristovski (Krstovski 61’), Mitrovski (Çurlinov 88’).
Seleksionues: Dobrinko Ilievski