Përfaqësuesja U19 e Maqedonisë nga nesër e nis ciklin për kualifikim në Kampionatin Evropian, i cili vitin e ardhshëm do të mbahet nga 15 deri më 25 korrik në Irlandën e Veriut. Futbollistët tanë të rinj do të përballen në shtëpi me Ukrainën në turin e parë të grupit 7 në kuadër të mini turneut eliminator.

Skuadra e seleksionuesit Toni Jakimovski sot ka bërë stërvitjen zyrtare para ndeshjes së nesërme me Ukrainën.

Toni Jakimovski, seleksionues i Maqedonisë nën 19 vjeç;

– Mendoj se mund ta përsërisim suksesin, jemi gati të përballojmë sfidën. Po përballemi me probleme rreth futbollistëve të lënduar. As për këtë turne nuk do të mund të llogarisim te Elmas. Sa i përket Daniel Markovskit, ai është në pikëpyetje. Ne do të përpiqemi të bëjmë gjithçka në fuqinë tonë për ta bërë atë të aftë për ndeshjen e nesërme.

Kemi një atmosferë të shkëlqyer në kombëtare, diçka që na ka hijeshi në turneun kualifikues në Poloni. Dëshira dhe motivimi i futbollistëve është në nivelin më të lartë. Edhe pse grupi nuk është tërheqës në shikim të parë, ai është shumë i fortë. Shpresoj që të luajmë si ekip dhe të japim maksimumin. Unë besoj në sukses.

Martin Gjorgievski, kapiten i Maqedonisë U19;

- Jemi të vetëdijshëm për mundësinë që na është paraqitur, që është mundësia për t'u kualifikuar në Kampionatin Evropian. Nuk e di nëse do të kishim përsëri mundësinë të luftojmë për diçka kaq të madhe dhe domethënëse për Maqedoninë. Jemi duke u përgatitur, sot kemi stërvitjen e fundit para ndeshjes së nesërme. E dimë që na pret një ndeshje e vështirë ndaj Ukrainës, por jemi gati, presim me padurim ndeshjen e nesërme dhe shpresoj që të arrijmë rezultat pozitiv.

Adrian Zendelovski, futbollist i Maqedonisë  U19;

- Kemi një skuadër shumë të fortë, besojmë shumë te vetja dhe këtë do ta tregojmë në ndeshjet e ardhshme. E arritëm objektivin e turneut kualifikues në Poloni për t'u kualifikuar në fazën Elite, tani duhet të përpiqemi të luajmë një ndeshje tjetër të mirë dhe të luftojmë për një kualifikim në Kampionatin Evropian.

Në ndeshjen e dytë të grupit 7 në kuadër të mini turneut kualifikues për kualifikim në Kampionatin Evropian, luajmë ndaj Zvicrës, ndërsa pas saj me Letoninë.