Në pritje të finales së Kupës së Maqedonisë që do të luhet të mërkurën, portieri i Teteksit, Vançe Mançevski u shpreh se për ekipin e tij përballja me bartësin aktual të trofeut do të jetë e veçantë. Mançevski me shumë komplimente foli për Rabotniçkin, mirëpo shtoi se futbollistët e Teteksit do të japin gjithçka nga vetja për të fituar trofeun e Kupës së Maqedonisë.

“Është kënaqësi e madhe të luash kundër Rabotniçkit, për ne finalja do të jetë ndeshje e veçantë. Do të japim maksimumin gjatë gjithë ndeshjes, me shpresë se do të fitojmë trofeun. Të gjithë më pyesin për penalti eventuale, mirëpo ne portierët mes veti kemi një shprehje: ‘Nuk egziston penalti e pritur mirë, ka vetëm penalti të egzekutuar keq”. Rabotniçki është favorit, këtë sezon vërtetuan se janë shumë kualitativ, mirëpo ne ishim autsajderë edhe dy vite më parë kur fituam Kupën dhe do të mundohemi të përsërisim këtë edhe tani”, deklaroi Vançe Mançevski.

Futbollisti i Rabotniçkit, Milan Ilievski thotë se Rabotniçki është favorit, mirëpo nuk do të nënçmojnë kundërshtarin.

“Ne kemi rolin e favoritit dhe nuk frikësohemi nga kjo. Do të bëjmë gjithçka që është në suaza të mundësive tona për të marrë fitoren. Nuk nënçmojmë skuadrën e Teteksit, të cilët krijuan ekip për respekt dhe sigurisht se do të luftojnë për titullin. Kemi objektiv të fitojmë dhe shpresoj të arrijmë këtë”, u shpreh Ilievski.