Seleksionuesi i përfaqësueses A të Maqedonisë, Lubinko Druloviq pas publikimit të listës së futbollistëve të ftuar për dy ndeshjet e rradhës në takim me gazetarë ka folur për pritjet e tij në takimet kualifikuese me Ukrainën më 9 tetor në Shkup dhe Bjellorusinë si mysafir tre ditë më vonë.

“Kemi ftuar disa futbollistë të rinjë të cilët me paraqitjet në skuadrat e tyre kanë merituar të jenë në listën time. Më vjen keq për disa futbollistë të rinjë të cilët nuk do të mund t’i kem në dispozicion, ndërsa kanë merituar t’i thëras, por në këtë moment prioritet ka përfaqësuesja e shpresave. Dukemi si ekip, nga ndeshja në ndeshje luajmë gjithnjë e më mirë. Ka hapsirë për përmirësim, ndërsa shpresoj që në të ardhmen edhe rezultatet do të jenë më të mira. Ivan Triçkovski luan në formë të shkëlqyeshme në një skuadër mjaft të mirë evropiane si që është Legia. Futbollist shumë kualitativ i cili mund të ngrejë ekipin në nivel më të lartë me kualitetin që posedon, e që është i padiskutueshëm. Me vete sjell përvojë të madhe dhe mund të jetë i dobishëm për ne, posaçërisht në pjesën e realizimit ku kemi probleme të mëdha në ndeshjet e fundit kualifikuese. Duelin me Ukrainën e vlerësojmë të rëndësisë së madhe për ne dhe nëse luajmë si me Spanjën mund të shpresojmë në diçka më tepër. Në takimin me Spanjën luajtëm shumë mirë si ekip. Megjithatë nga ajo ndeshje mund të jemi të kënaqur vetëm nga loja, por jo edhe rezultati. Sinqerisht shpresoj se në ndeshjet e ardhshme kualifikuese do të na shërbejë edhe fati sportiv që nuk ishte në anën tonë kundër Luksemburgut dhe Spanjës”, është shprehur seleksionuesi i përfaqësueses A të Maqedonisë, Lubinko Druloviq.